Strixxikli romantiċi
Imħabba Vera kien strixxiklu li ħareġ għall-arja dak li qabel qatt ma kien għadu deher fil-pubblikazzjonijiet Maltin. Sa l-1984 l-influs barrani kien ikkontrollat u ċ-ċensura kienet għadha meqjusa importanti. Joe Sacco kien avviċina lill-pubblikatur Emmanuel Debattista tal-PEG u ppropona s-sensiela ta’ IMĦABBA VERA . Dan aċċetta u s-sensiela ħarġet u kienet suċċess speċjalment mat-tfajliet li għalihom kienet immirata. Joe Sacco li beda l-karriera tiegħu ta’ strixxikolist propju minn din is-sensiela, waqaf f’għadd 6 tal-pubblikazzjoni u emigra lura lejn l-Amerka fejn għamel isem għalih innifsu f’din il-linja tal-comics. Warajh komplew oħrajn bħal Peter Zammit, Vince Pace u Mark Vella bil-pinna ta’ Josephine Tonna. Jagħtini x’nifhem li dawn huma psewdonomi ta’ artisti Maltin li żammew mat-tradizzjoni antika fost il-kartunisti li jużaw isem ieħor flok dak tagħhom.
Fis-snin tmenin l-istrixxikli ta’ IMĦABBA VERA qajmu interess qawwi l-iktar fost it-tfajliet li kienu jgħoxew bl-intriċċi tar-relazzjonijiet bejn it-tfajliet u l-ġuvintur fl-istejjer. Ix-xenarju maħluq kien realistiku ħafna, bl-atmosfera tipika fid-dar Maltija u għall-ewwel darba fir-rakkont impinġi rajna xeni tat-tfajliet qed ibiddlu jew mistriħin fuq is-sodda bil-qalziet ta’ taħt u r-riċipettu. Intenzjonati biex iqanqlu ċerta senswalità u erotiżmu fl-istejjer, mhux dejjem kienu espliċiti imma għal dak iż-żmien din kienet novità kbira. Imma aktar minn dan l-aspett viżiv, kien hemm it-temi fl-istejjer li kienu jqajmu argumenti jaħarqu għaliex IMĦABBA VERA kien qed jesponi l-verità tas-sess u t-tqala qabel iż-żwieġ kif ukoll jillustra d-divertiment taż-żgħażagħ bix-xorb u l-libertinaġġ kif kien ipprattikat dak iż-żmien. IMĦABBA VERA baqa’ joħroġ sa għadd 21.
Nru. 2 Tard Wisq! kitba u tpenġija ta’ Joe Sacco
Nru. 3 Tirbaħ l-Imħabba kitba u tpenġija ta’ Joe Sacco
Nru. 4 It-Tradiment kitba u tpenġija ta’ Joe Sacco
Nru. 5 F’Dinja ta” Ngann kitba u tpenġija ta’ Joe Sacco
Nru.6 Għall-Imħabba Tiegħek kitba Josephine Tonna tpenġija Vince Pace
Nru.7 Il-Kamra tan-Nar kitba Joe Sacco
Nru.8 Imrar kitba Josephine Tonna tpenġija ta’ Mark Vella
Nru.9 Qalb maqsuma kitba Josphine Tonna Tpenġija Vince Pace
Nru.10 Imħabba miċħuda kitba Josephine Tonna tpenġija Peter Zammit
Nru.11 Id-Diżgrazzja kitba Josephine Tonna tpenġija ta’ Vince Pace
Nru.12 Ilsien in-nies kitba Josephine Tonna tpenġija Vince Pace
Nru.13 Ferħ u dwejjaq kitba Josephine Tonna tpenġija Vince Pace
Nru.14 Ħolm kitba Josephine Tonna tpenġija Peter Zammit
Nru.15 L-Għażla kitba Josephine Tonna tpenġija Vince Pace
Nru.16 Inkwiet kitba u tpenġija Vince Pace
Nru.17 Id-Drogat kitba Josephine Tonna tpenġija Peter Zammit
Nru.18 Il-Ħalliel it-Tajjeb kitba Josephine Tonna tpenġija John S. Falzon
Nru.19 L-Aħwa kitba Josephine Tonna tpenġija Peter Zammit
Nru.20 Il-Milied ta' Noel kitba Josephine Tonna tpenġija Peter Zammit
Nru.21 Ir-Raġel Miżżewweġ kitba Josephine Tonna tpenġija vince Pace
